چند صفحه اول کتاب
گؤتۆرگه‌نی* آقای شهردار باشلادیلار. اوْنلار اؤزل یئردن چیخیش سرگه‌سینین* دالیسینا چاتینجا، «گنج دانش» اوْخولونون مدیری میکروفونو سینادی. قند شکر اداره‌سینین معاونی سرگه اۆستۆنه سو قوْیدولار. قاباق سیرادا اوْتوران اوْجا بوْی بیر آغا قالخیب، سرگه اۆستونده‌کی چیراغی یاندیردی.
گئجه‌دن بیر آز کئچمیشدی. قالین بولوت گؤیۆ توتموشدو. هردن دایلاق بیر ایلدیریم آتیشقادان ساللیغین* ایچینه تؤکۆلۆردۆ. اوْلانلار دیسکینیب قایغین* ائشیگه باخیردلار. چیلقین بیر یئل تئزلیکجه یاغیشدان خبر وئریردی. آقای شهردارین چیخیشی بئله باشلادی:
«محترم حضّار، رئیسلر، معاونلر، کارمندلر دۆزگۆن جاندان کئچمیش خادملر! بی‌نهایت افتخارینان سئوینیرم بو گؤرکملی شب‌نشینینین افتتاحی بنده‌یه تاپشیریلیب. نییه کی بو مجلسده شهرداری بازنشسته‌لریندن سوْرا، فرهنگ اداره‌سی، دخانیاتینان انحصارات اداره کلی، قند شکر اداره‌سی، پست و تلگراف اداره‌سی، متوفّیات اداره‌سی، ثبت احوالینان املاک اداره‌سی، دارایی اداره‌سی و آیری کشوری محترم اداره‌لرین محترم بازنشسته‌لری واردیلار. بو شب نشینی بازنشستگی افتخارینا چاتان بۆتۆن اوْنلاردان تشکر اۆچۆندۆ. دۆزدۆ بیر عدّه‌ده بو افتخارا ال تاپمامیش، حؤکملری ابلاغ اوْلمامیش آللاهین رحمتینه گئدیب، مجلسیمیزی اؤز حضورلاریندان محروم قوْیوبلار. ثانیاً بۆتۆن محترم حضّارا آیدین بللیدی کی بوگۆن دۆنیا علم دۆنیاسیدی. علمینن هنر پارلاق گۆنش تکین هر یئری توتوب، یاز بولوتو تکین گۆن چیخاندان گۆن باتانا هر یئری دوْیوروب. هر گۆن عجیبه اختراعلار غریبه اکتشافلار دۆنیا صفحه‌سینه آیاق قوْیوب کی بۆتۆن بنی بشرین حیرتینه باعث اوْلور. گۆنۆ گۆندن چوْخالان پیشرفتلر باعث اوْلوب بشر بیر گؤز قیرپیمیندا دۆنیانین بو باشیندان اوْ باشینا اوچسون. اقیانوسلاری کئچسین، آللاهین گۆجۆن هر یئرده گؤرسۆن. آلمانلی آدلیم دانشمند، فرانسالی گوستاو لوبون دئدیگی کیمی نوح عؤمرو ائله‌سین.»
اوْلانلار برکدن چپیک چالدیلار. باشین ساغا سورلا فیرلادان آقای شهردار، نئچه قیرپیم گؤزله‌دی ائشیدنلرین ایستی دویغولاری یاواشیسین. بو آرادا گؤیدن بیر آغیر زاد کئچیب، قاشدا پارتلادی. اوْنون دالیسیجا یاغیشین گور یاغماسی ساللیغین قاش چاتیسی* اۆستۆنده باشلادی. آقای شهردار چیخیشین دالیسین توتدو:
«بعله، محترم حضّار، اگر کامل بصیرت گؤز ایله بو محیرالعقول پیشرفتلری گؤزدن کئچیرتسک هامییا بللی اوْلاجاق بۆتۆن بو تحولّلرین اصلی عاملی علمینن عمل کیشیلیری ایدیلر گئجه گۆندۆز چالیشماقدان اوْتورمویوب مملکتین اصلی چرخلرین دوْلاندیریبلار. بو حسابینان بو بئله دینگیلتیلی* دۆنیادا بو اوجسوز دریانین آراسیندا بیزیم وظیفه‌میزدی عالمینین دانشمند کیشیلریمیزدن یانی بیر لحظه‌ده فداکارلیقدان چالیشماقدان اسیرگه‌مه‌ین محترم بازنشسته-لریمیزدن تشکر ائلییک. محترم آغالار! بیر عدّه منفی‌باف، سؤز گزدین آدامین یالان سؤزلرینین خلافینا، دولتین شریف کارمندلرینین آراسیندا بئله آداملار آز دگیرلر. معلملر کی حوصله اینن صبرینن سۆمۆک سیندیریب بیزیم اوشاقلاریمیزی ساوادلی بارا گتیریللر، بو بؤیۆک عالملردن ساییلیللار. گئجه گۆندۆز بایگانیلرده منطقه‌ای عمرانینان معنوی پیشرفتلره باغلانان سندلر و مدارکین تنظیمینه مشغول اوْلان کارمندلر ده بو گروهدان ساییلیلار. بیر سۆپۆرگه‌چینین ایشینین معنوی دگری آزمایشگاهدا خطرلی زیانلی میکروبلاری آردان آپارماغا مشغول اوْلان بیر دانشمنددن آز دگیر….
