چند صفحه اول کتاب

گیریش
مین اۆچ یۆز قیرخ یئتدی – سکگیزینجی ایللرده یاواش یاواش «کلیدر»ی یازماغا ساری گئتمک اۆرگین اؤزۆمده تاپمیشدیم. اوْ گۆنلر دویغودا آنلامدا ایندیکی گؤردۆگۆنۆزدن آراسی اوْلمایان رومانین بیتیشیندن بیر پارچاسین یازدیم. «کلمیشی» قوْجاسینین اوشاقلاری، قارداشی کیمسه سینین آختارماغینا داغ دؤشۆنه دیرماشماسی ایدی. بیر چیلقین آدامین ائله دیگی تکین. سانکی اوْ کیشی گؤی ایله داغ ایله دانیشیب سوْروشوردو هارداسیز آی اوْغلانلاریم، قارداشلاریم… اوْن بئش ایل گیرگین داستان یازماق دؤرانیمدان کئچیردی بو اۆرگه ال تاپمیشدیم. بیر دانیشیقدا دئدیگیم کیمی بیر دعا ایله مناجاتا اوْخشار یازیدا دری ادبیاتینین آتالاری بؤیوکلریندن کؤمک ایسته‌دیم. اوْ ایشی باشلاییب آراسی کسیلمه دن اللی ایکنیجی ایلین ایکینجی یاریسی اللی اۆچۆنجۆ بیرینجی یاریسیناجان گئدیردیم. ائله بیلدیم کلیدر داستانینین متنیدن قیراقدا بیر داستانلار بئینیمده وار گرک بیر اویغون ماجالدا یازیم، قیراغا قوْیوم، سوْنرا قاییدیم کلیدرین سوْراغینا. بئله سانیردیم کلیدر منی اللینجی اوْن ایلین سوْنونجان اؤزۆ ایله آپاراجاق.
بونا گؤره کلیدرین بیر یئرینده اوْنو قوْیدوم قیراغا، باش قوْشدوم بئینیمی چالیشدیران بیر داستانلارا. گرک اوْنلاری یازیب جانیمی قورتارایدیم. بوندان قاباق بیر آز اوزون «پایینی ها» رومانینین ایکینجی یازماسینی قورتاریب قیراغا قوْیموشدوم. ایندی گرک باش قوْشایدیم «عقیل، عقیل»، «از خم چنبر»، «دیدار بلوچ» ایله … «روز و شب یوسف» داستانلارینا. باش قوْشوب یازدیم.
یئنه کلیدره قاییتماق اۆچۆن، بیر جاردا «در اعماق» ایشینین چتین تئاتری منی آپاردی. تئاتر بیتمه میشدی، من هله اؤز اؤنملی ایشیمه دؤنمه میشدیم مین اۆچ یۆز اللی اۆچۆنجۆ ایلین سوْنوندا – اسفند آیلاریندا- ایکی دقیقه لیک منی دوْستاغا آپاردیلار. یانی ایکی ایل. عقیل – عقیل داستانین باسیلمیشی دوْستاقدا الیمه چاتدی. «دیدار بلوچ» (سفرنامه) از خم چمبر (چنبر) کتابلارین او ایکی ایللیک سیناقدان سوْنرا باسیما تاپشیردیم. «پایینی ها» باشی هارداسا باتدی. «روز و شب یوسف» _ائله بیل ناشره تاپشیردیغیم- بیر خالوار ال یازمالاریمین آراسیندا گؤزه گلمه دی. منیم گۆمانیمدا «روز و شب یوسف» گئتمیشدی «پایینی ها» رومانی ایله «درخت» این قیسسا نمایشنامه سی گئدن یئره.
قارانتازینا سوْن ائو تؤکمه ده اوْنون ال یازماسی ایله جیندا ییغیلمیش یازقیسی تاپیلدی. قارشینیزدا اوْلان بو دفتر یئنه تاپیلمیش اوْتوز ایلین قالیغیدی. حیفیم گلدی بو داستانلار یازارین ایشلرینده گلمه سین. یادیما گلن دیسکینتیسین اۆچ بوجاغیندا یارانان اثرلردندی:
الف) «کلیدر»دن اوزاقلاشماق.
ب) تئاتر ایشلرینه، اوْنون سوْروملارینا قاریشماق، قورپون گونئی ماحاللارینا قوردوغو سفرلر.
ج) یاشاییش، کئچینیش، ایش، اداره اوْ زامانین گۆنده کی دورومو.
بۆتۆن آجی خاطیره لری یادا گتیرمک خوْشا گلیم دگیل. گرک بیر پاراسین اونوداسان آنجاق «روز وشب یوسف»ین یئنیدن تاپیلماغی بونا دگر کی بیر نئچه قیرپیم اؤزۆمۆ عؤمرۆن اوْ بؤلۆمۆنده گؤرۆم. همده یازماق یانقی ایله آلوْون اوْ گۆنلرین، عؤمرۆن اوْ ایللرینده دیسکینتی- هۆرکۆنتۆنۆن اۆچ بوجاغیندا یادا گتیریم. ایندی «روز و شب یوسف». مین اۆچ یۆز اللی ایکینجی ایلین یازیسی.

محمود دولت آبادی
تهران. خزل 82

بیر کؤلگه‌‌ ‌ ‌دالیسیجا ایدی. همان همیشه‌‌ کی کؤلگه. کؤلگه، اؤزۆن دووارین کؤلگه‌‌سینده‌‌ ‌ ‌ایتیریب، یئنه‌‌ ‌ ‌تاپیلیردی. زیرپی ایدی. یوسفون گؤزۆنه‌‌ ‌ ‌زیرپی گلیردی یا گئجه‌ده‌‌ ‌کۆچه‌‌لرین آلاتوْرانلیغی اوْنو زیرپی، لاپ زیرپی گؤستریردی؟ هر نه‌‌ ‌ایدی، بو کؤلگه‌‌ ‌یوسفون فیکیرین دوْلدورموشدو. قارا باسما تکین بیر زاد ایدی.
اؤنگه‌سی ایکی آدامجا گؤرسه‌نیردی. یوسف ائله‌‌ ‌بیلیردی گرک چوْخ اتلی، ایری سۆمۆکلۆ اوْلسون. کؤپمۆش بیر اینک تکین. دریسینه‌‌ ‌سامان تپیلمیش اینک تکین. قارنی بلکه‌‌ ‌چوْخ قاباغا گلیب. اینک قارنی تکین.
کؤینگی قارنین یئنیشین اؤرتن یئری گرک کیفیر اوْلسون. گؤن تکین. بئل قاییشی گرک ایشگه‌‌ ‌اوْلسون. گرک کؤهنه‌‌ ‌اوْلسون. ایشگه‌‌ ‌کؤهنه‌‌ ‌قاییشین گرک گؤبک اۆسته‌‌ ‌باتیب شیشمیش قارنینی ایکی یئره‌‌ ‌بؤلمۆش اوْلسون.
بیر گئن پئنجک گرک اگنینده‌‌ ‌اوْلسون. دستکلری قوْللاردان اوزون اوْلان بیر پئنجک. کؤک اللر، قیسسا بارماقلارلا. اللری اینگین قالمیش اتی تکین گؤگ اوْلسون. اللرین دامارلاری گرک اتده‌‌ ‌ایتمیش اوْلسونلار. اللرین دالیسی، بیلک، قوْل، دؤش، چیگینلر گرک خال دؤگمه‌‌ ‌اوْلسون. بوْزارمیش کؤهنه‌‌ ‌خاللار.
تومانین بئلی گرک گئن اوْلسون. قارنینا باغلادیغی قورشاق، آغین یؤره‌‌‌سین، تومانین قاباغین بۆزۆب، قیچلاری داردیر. دیزلرین باشی گرک کیفیر باغلی اوْلسون. بلکه‌‌ ‌سۆرتۆلۆب ساپدان چیخیبلار. باشماقلارین دابانلاری‌دا گرک سۆرتۆلمۆش اوْلسونلار. بلکه‌‌ ‌باشماقلارین اۆستۆ، تابانلارین اۆستۆ چارتلامیش اوْلسون. باشماقلاری گرک قورو اوْلسون. گرک چوْخ ایشله‌‌‌میش اوْلسون. …
همیشه‌‌ ‌بیلگینه‌‌ ‌دوْلادیغی سوولوق دا نه‌‌ ‌قدر گرک کیرلی اوْلسون؟ آغیز بورون سویو، تر یاغ کیری. یوسف اؤزۆده‌‌ ‌بیلمیردی نییه‌‌ ‌گرک اوْنون بۆتۆن پالتار- مالتارلاری کیرلی- یاغلی اوْلسون؟
نییه‌‌ ‌دویوردو گرک کیشینین پئنجگین چیگینلری یاغدان کیردن گؤن تکین اوْلسون؟ یوسفا بئله‌‌ ‌گلیردی بو پالتار ایللردی بو کیشینین اگنینده‌دیر. گئن سۆرتۆک پالتارلار. سؤکۆک شاققیلداقلی. آنجاق اۆزۆ، اۆزۆ نئجه‌‌ ‌اوْلا بیلردی؟
یوسف هله‌‌ ‌اۆزۆن گؤرمه‌‌میشدی. اوْندا هاردان بیلیردی؟ تکجه‌‌ ‌سانقیرا بیلردی. سانقیرا بیلردی اۆزۆن گوْبود تۆکلر بورنونون باجالاریندان ائشیگه‌‌ ‌باسیب. کؤهنه‌‌ ‌تۆکلری، آغ قارا. دوْداغینین اۆستۆ گرک گئن اوْلسون. بوغو گرک چیتما اوْلسون